Em Notfall brauchsch hald doch Bargeld!

Dr ledschde Sonnágruáß am Dinschdichábád! © KS

Liábe Leit!

Am vorgangáná Donnerschdich isch gladd dr Gloreng vorreggd ond was mach mr jedzd? Náhoggá kasch nemme, weil dr sonschd dr Henderá eiglemmsch. Also geh mr an neiá kaufa em Baumargd. Ond ná em Baumargd semmr zu dene neie Gloreng mit Deggl kommá, ach herrje, dá gibbz já honderderlai vorschiedene Ausfihrongá mid de oomeglichschde Muschdr druff! Ond ned bloss des, Breiße henn diá, dá haud des gladd om. Wellád diá doch bis zu 99,90 € für so an Glosidz, wo´d blos druffhoggsch, om dai Gschäfd zu verrichdá! Was mach mr jedzd? S´muásch hald oin kauffá, weil´s hald ned andersch gáhd! Ná fahrsch mid dm deirá Sitz em Eikaufswagá zum Zahlá an´d Kass. Jedzd stáhd dá á Schild, mid´m Hinweis:“ Im Moment ist keine Kartenzahlung möglich!“ Ond worom gáhd´s nemme? Ná sechd die Kassierere, weil diá Verbindung zom Server he isch ond siá kenná bei mir bloos no bar zahlá! Aua, jedzd wird’s schwierich, hasch no so viel em Geldbeitl odr nedd, also dreá mr den an dr Kass rom ond zehlád diá Barschaffd durch, hurra, s´langd no! Ná semmr doch no zu onsrám Glosidz kommá! Abr dá siehsch, wiá doch von dem neimodischá Zeigs abhänggich bisch.

Abr ois hemmer dá dr´bei glernd, dass emmr au á baar Schai em Sack hann muásch, wenn aikaufá gásch!

1 1